ரீல் 4: EZ டெக்னிக்கல் அனாலிசிஸ்


ஹலோ!

டெக்னிக்கல் அனாலிசிஸ் ஈசியாகக் கற்றுக்கொள்ள…… என்ற தலைப்பினை ஈஸி TA என்று மாற்றி விட்டேன். உங்கள் ஆதரவு தொடர்ந்து தேவை!

இன்றைய ஸ்டாக் LT

முதலில் மாத வரைபடத்தைப் பார்த்தால், ஒரு ஹெட் & ஷோல்டர் (HnS) தெரிகிறது. அதன் நெக்லைன் சப்போர்ட் உடைபட்டு, மறுபடியும் விலை மேலேயேறி வந்து அந்த நெக்லைன் சப்போர்ட்டில் ரீ-டெஸ்ட் நடத்தியுள்ளது. முந்தைய நெக்லைன் சப்போர்ட், இப்போது ரெஸிஸ்டன்ஸாக மாறியுள்ளதால், விலை மறுபடியும் கீழேயிறங்குகிறது.

இதிலே கவனிக்க வேண்டியவை: 2009 ஏப்ரல் – 2010 நவம்பர் வரை ஒரு அப்ட்ரெண்ட்; மே 2009 – செப்டம்பர் 2011 வரை ஒரு HnS அமைப்பு உருவாகியுள்ளது. 2011 செப்டம்பர் கடைசி வாரத்தில் 1020 என்ற லெவலில் இந்த HnS அமைப்பின் நெக்லைன் சப்போர்ட் உடைபட்டு விலை கீழேயிறங்க ஆரம்பித்துள்ளது. அவ்வாறு இறங்கிய இறக்கத்தின் போது, அதிகமாகும் வால்யூம் அளவும் இந்த அமைப்பின் வலிமையைக் காட்டுகிறது.

சரி! 1020 என்ற லெவலில் நெக்லைன் உடைபட்டுள்ளதென்பதனை நோட் செஞ்சிக்கோங்க! ஓகே-வா? இப்போது எவ்ளோ தூரம் (எத்தனை புள்ளிகள் வரை) கீழேயிறங்கும் என்பதனைக் கணக்கிடலாம்!

இந்த அமைப்பின் தலைப் பகுதியின் ஹை 1475. அதற்கு நேர்கீழேயிருக்கும் நெக்லைனின் மதிப்பு 985. எனவே, இந்த அமைப்பின் நெக்லைன் உடைபட்டால், 1475 – 985 = 490 புள்ளிகள் வரை கீழேயிறங்க (உடைபட்ட இடத்திலிருந்து) வாய்ப்புள்ள அமைப்பிது. (அதாவது தலைப்பகுதியின் ஹை – அதற்கு நேர் கீழுள்ள நெக்லைனின் அளவு)

சோ, டார்கெட் = 1020 – 490 = 530 என்ற அளவு வரை LT ஸ்டாக் இறங்க வாய்ப்புள்ளது.

ரிஸ்க் = (ரைட் ஷோல்டரின் ஹை 1245) – 1020 = 225 புள்ளிகள்.

RR ரேஷியோ (ரிஸ்க் ரிவார்ட் ரேஷியோ என்று சொல்வார்கள். அதாவது நாமெடுக்கும் ரிஸ்க்குக்குத் தகுந்த ஆதாயம் கிடைக்கிறதாவென்று பார்க்கும் ஒரு கணக்கு) = 225 : 490 => 1 : 2.17

அதாவது நாமெடுக்கும் ஒவ்வொரு ரூபாய் ரிஸ்க்குக்கும் 2.17 ரூபாய் ஆதாயமிருக்கும் டிரேட் இது.

படம் 1: LT - மாத வரைபடத்தில் தெரியும் ஹெட் & ஷோல்டரும், ரீ-டெஸ்டும்

படம் 1: LT – மாத வரைபடத்தில் தெரியும் ஹெட் & ஷோல்டரும், ரீ-டெஸ்டும்

ஓகே! 530 வரை இறங்குமென்றால், ஒரே நேர்க்கோட்டில், ஒரு சில மாதங்களில் இறங்கினாலும் இறங்கலாம். இல்லையென்றால், நமது பொறுமையை சோதித்து மேலும், கீழும் சென்றும் இறங்கலாம். அதுவும் இல்லையென்றால், இறங்காமல் மேலேயும் செல்லலாம்.

18 மாதங்களாக உருவான இந்த அமைப்பு, செப்டம்பர் 2011-இல் நெக்லைன் சப்போர்ட்டை உடைத்துக்கொண்டு கீழே இறங்கிய விலை, 650 வரை கீழே வந்து மறுபடியும் மேலேயேறி, 2012 டிசம்பர்-2013 ஜனவரியில் நெக்லைன் சப்போர்ட் கோட்டினை ரீ-டெஸ்ட் செய்துள்ளது. அந்த (முந்தைய சப்போர்ட்) லைன் தற்போது ரெஸிஸ்டன்ஸாக மாறி, மறுபடியும் விலையினைக் கீழே தள்ளுகிறது. (இதுதான் டெக்னிக்கல் அனாலிசிஸின் ப்யூடி!)

இதைத்தான் டெக்னிக்கல் அனாலிசிஸில் சொல்வார்கள், “மார்க்கெட் எப்போதுமிருக்கும்; சான்ஸ்கள் வந்து கொண்டேயிருக்கும். ஒன்றைத் தவறவிட்டால், அதனைத் துரத்தக்கூடாது; பொறுமையுடன் அடுத்த வாய்ப்புக்குக் காத்திருக்கணும்” என்று! செப்டம்பர் 2011-இல் தவற விட்டிருந்தால், ஜனவரி 2013-இல் ஷார்ட் பொசிஷன் எடுக்க அருமையான வாய்ப்பு. (ஸ்டாப்லாஸ் எது தெரியுமா? ரைட் ஷோல்டரின் ஹை-யான 1245-தான்)

சரி! அடுத்ததாக, இந்த ரீ-டெஸ்ட் நடக்குமிடத்தை வார வரைபடத்தில் கொஞ்சம் zoom போட்டுப் பார்க்கலாம். மாத வரைபடத்தில் பார்த்த ரீ-டெஸ்ட் நடந்த அதே இடத்தில் ஒரு சிறிய ஹெட் & ஷோல்டர் தெரிவதையும், அதன் நெக்லைன்(நீல நிறக் கோடு) 905 லெவலில் உடைபட்டு, விலை கீழேயிறங்கி, தற்போது மீண்டும் மேலே ஏறி நெக்லைன் ரீ-டெஸ்ட் நடைபெறுவதையும் பார்க்கலாம்  இது ரெஸிஸ்டன்ஸாக மாற வாய்ப்புள்ளதால், இங்கே ஷார்ட் சென்று (905-915 லெவலில்தான் போகவேண்டும். தற்போதைய 830 லெவல்களில் ஷார்ட் போகக்கூடாது. ஏன் தெரியுமா? ரிஸ்க் ரொம்ப அதிகம்)

படம் 2: LT வார வரைபடத்தில் இன்னுமொரு குட்டி HnS! அதுவும் மாத வரைபடத்தில் ரீ-டெஸ்ட் நடந்த இடத்திலேயே!

படம் 2: LT வார வரைபடத்தில் இன்னுமொரு குட்டி HnS! அதுவும் மாத வரைபடத்தில் ரீ-டெஸ்ட் நடந்த இடத்திலேயே!

ஏனென்றால், ஸ்டாப்லாஸ் 1090 (ரிஸ்க் = 1090 – 905 = 185 புள்ளிகள்)

ரிவார்ட் புள்ளிகள் தலையின் ஹை 1145 – அதற்கு நேர் கீழே இருக்கும் நெக்லைன் லெவல் 885 = 260 புள்ளிகள்.

சோ, இத டார்கெட் = 905 – 260 = 645 வரை கீழே செல்லும் வாய்ப்புள்ள அமைப்பிது.

(குறிப்பு: ரீ-டெஸ்ட் என்றால் என்னவென்று இப்போது புரிகிறதல்லவா? இதன் ரிஸ்க் ரிவார்ட் ரேஷியோ என்னவென்றும் நீங்களே கணக்குப் போட்டுப் பாருங்களேன்!)

இந்த வார வரைபடத்தின் டார்கெட் முதலில் வருகிறதாவென்று பார்ப்போம். அதன் பிறகுதான், மாத வரைபடத்தில் பார்த்த 530 டார்கெட்டைப் பற்றி யோசிக்கவேண்டும். இங்கே நாம் எழுதிவிட்டதால் மட்டுமே அந்த டார்கெட்கள் எல்லாம் வரவேண்டுமென்ற அவசியமில்லையே! ஏனென்றால்,

மார்க்கெட்தான் மாஸ்டர்!

அன்புடன்,

பாபு கோதண்டராமன்

பி.கு: “என்னங்க சார்? EZ டெக்னிக்கல் அனாலிசிஸ்-னு ஹெடிங்க் போட்டுட்டு, 20 மார்க் கொஸ்டீன்னுக்கு ஆன்சர் எழுதி வச்சிருக்கீங்களே!”ன்னு கேக்குறீங்களா? என்ஜாய்!

ACC ஹெட் & ஷோல்டர் – பாகம் 2


ஹலோ!

கடந்த ஆகஸ்ட் 30-ஆந்தேதியன்று எழுதியதன் தொடர்ச்சி.

தொடர்ச்சி மட்டுமல்ல; எவ்வாறு டெக்னிக்கல் அனாலிசிஸ் தெரிந்தால், நமக்குக் கிடைக்கும் வாய்ப்புகளை நாம் பயன்படுத்திக் கொள்ளமுடியுமென்றும் இந்த சார்ட்டின் மூலம் புரிந்து கொள்ளலாம்.

அதாவது, இந்த ஸ்டாக் நெக்லைனை உடைத்துக்கொண்டு கீழே சென்றபோது, நாம் ஷார்ட் போக மிஸ் பண்ணியிருந்தாலும், ரீடெஸ்ட் நடக்கும் இந்த நேரத்தில் மார்க்கெட் நமக்கு ஒரு வாய்ப்புக் கொடுக்கிறதென்று புரிந்து கொள்ளவேண்டும்.

மற்றவை படத்தில்!

ACC-யில் ஹெட்&ஷோல்டரின் ரீடெஸ்ட் நடக்கும் நேரமிது!

ACC-யில் ஹெட்&ஷோல்டரின் ரீடெஸ்ட் நடக்கும் நேரமிது!

20130328 நிஃப்டியின் 200SMA சப்போர்ட்


ஹலோ!

நான் 23/03 அன்றைய இந்தச் சார்ட்டக் கொஞ்சம் டெக்னிக்கலாப் பாருங்க – பாகம் 2  பதிவிலே என்ன எழுதியிருந்தேன்? நிஃப்டி HnS பேட்டர்னில் இருப்பதால், 5250 வரை கீழே செல்ல வாய்ப்பிருக்கிறதென்று எழுதியிருந்தேன்.

ஆனால் வரைபடத்தைப் பார்த்தால்

படம்: நிஃப்டியின் 200SMA

படம்: நிஃப்டியின் 200SMA

கடந்த இரு நாட்களாக (26 & 28 மார்ச்; 27 ஹோலி விடுமுறை. 29 Good Friday விடுமுறை), மேலே செல்லும் வகையிலான white candle (ஒயிட் கேண்டில்ஸ்டிக்) உருவாகியுள்ளது. அதாவது ஒரு 5620 என்ற லெவலிலிருந்து 5,682.55 என்ற லெவலில் முடிந்திருக்கிறது. அதாவது காளைகள் சந்தைக்குள் வந்து வாங்கத் தொடங்கியிருக்கிறார்கள் என்று அர்த்தம் கொள்ளலாம்.

ஏன் இந்த 5620 என்பதைக் கொஞ்சம் பார்த்தால். அது 200 SMA (சிம்பிள் மூவிங்க் ஆவரேஜ்)-ஆக அமைகிறது (பச்சை நிறக் கோடு). மார்க்கெட்டும் oversold கண்டிஷனில் இருத்துள்ளது. எனவே, இங்கு ஒரு bounce back ஆகி மார்க்கெட் உயர்ந்துள்ளது. இதை நான் ஏன் எழுதுகிறேனென்றால் 200SMA மற்றும் 200EMA போன்றவை ஒரு நல்ல சப்போர்ட் அல்லது ரெஸிஸ்டன்ஸ்-ஆக மாறுவதற்கான வாய்ப்புகளிருக்கின்றன எனபதை நீங்கள் தெரிந்து கொள்ளவேண்டும். இங்கே இது ஒரு சப்போர்ட்டாக மாறியுள்ளது.

இன்னமும் HnS பேட்டர்ன் இருப்பதால், இப்போது மேல்நோக்கிச் செல்லும் விலை நெக்லைனை ரீடெஸ்ட் செய்யும்போது என்ன நடக்கிறதென்பதை பொறுத்திருந்து பார்க்கலாம்! 🙂

அன்புடன்,

பாபு கோதண்டராமன்

20130325 LICHSGFIN ஒரு டெக்னிக்கல் பார்வை


20130325 LICHSGFIN ஒரு டெக்னிக்கல் பார்வை

ஹலோ!

நேற்றைய பதிவிலே, LIC Housing Finance-இன் சார்ட்டைப் போட்டு, அதைப் பற்றி இன்று எழுதுகிறேனென்று சொல்லியிருந்தேன். அதைப் பற்றி இப்போது பார்க்கலாம்.

இதுதாங்க அந்தப் படம்.

படம் 1: LICHSGFIN - சும்மா! ஒரு glance விடுங்க!

படம் 1: LICHSGFIN – சும்மா! ஒரு glance விடுங்க!

 முதலில் எனக்குத் தெரிவது ஒரு ஹெட் & ஷோல்டர்ஸ் பேட்டர்ன்தான்

ஹி..ஹி..ஹீ. எங்கே போனாலும் நான் அதை விட மாட்டேனுங்க! இந்தப் படத்திலிருந்து உங்களுக்கு ஒரு பயிற்சி கொடுக்கிறேன்.

படம் 2: LICHSGFIN - தெரியுதா ஒரு ஹெட் & ஷோல்டர்ஸ் வடிவமைப்பு?

படம் 2: LICHSGFIN – தெரியுதா ஒரு ஹெட் & ஷோல்டர்ஸ் வடிவமைப்பு?

அ) தலைப்பகுதியின் உச்சத்திலிருந்து, அதற்கு நேர்கீழே நெக்லைன் வரை ஒரு செங்குத்துக்கோடு (vertical line) வரையுங்கள். அந்தக்கோடு நெக்லைனை எந்த ப்ரைஸ் லெவலில் தொடுகிறது என்று பாருங்கள். பிறகு, டார்கெட் சோன் (target zone), அதாவது எத்தனை புள்ளிகள் இறங்க வாய்ப்பிருக்கிறது எனக் கண்டுபிடிக்கவும்.

ஆ) இந்த H&S பேட்டர்ன், நெக்லைனை எந்த இடத்தில் உடைத்துக்கொண்டு கீழே சென்றுள்ளது (neckline breakdown area)? அதன் அளவு என்ன?

இ) இந்த நெக்லைன் பிரேக்டௌன் அளவிலிருந்து, டார்கெட் சோன் அளவைக் கழித்தால் உங்களுக்கு டார்கெட் கிடைத்து விடும்.

என்னங்க! டார்கெட் கண்டுபிடிக்கிறீங்களா? (“என்னங்க சார்! அதுதான் அந்த பேட்டர்னில் இருந்து நன்றாகக் கீழே இறங்கிவிட்டதே! இங்க்கா எந்துக்கு கண்டுபிடிக்கவால?”ன்னு தெலுங்குல கேக்குறீங்களா? சும்மா! ஒரு பயிற்சிக்குன்னுதான் ஆரம்பத்திலேயே சொல்லிட்டேனுங்களே!

இருங்க, இருங்க! முதல்ல இந்தப் பாட்ட கும்க்கி ஸ்டைல்ல பாடிப் பாருங்க!

 சொல்லிட்டேனே….

   ஒரு பயிற்சின்னு…

சொல்லும்போதே….

   ஒரே ஜாலிதான்..

“பாபு! போதும்யா…! அவங்கெல்லாம் தாங்க மாட்டாங்கய்யா..! நிறுத்திடுங்கப்பு….!” அப்படீன்னும் பரவை முனியம்மா அவர்களின் ஸ்டைலிலும் சொல்லிப் பாத்துடுங்க.

ஈ) அட சொல்ல மறந்துட்டேனுங்க! நான் மறந்தாலும், இனிமே நீங்க மறக்காதீங்க! TA-விலே ஸ்டாப்லாஸ் முக்கியமுங்க! இந்த H&S-க்கு, ரைட் ஷோல்டர் டாப்தான் ஸ்டாப்லாஸ். அதுவும் என்னன்னு பாருங்க!

உ) அப்டீயே இந்த டிரேடுக்கு ரிஸ்க் எவ்வளவு; ரிவார்ட் எவ்வளவுன்னும் கணக்குப் போட்டுப் பாத்து, நமக்கேத்த டிரேடான்னும் பாத்துக்கோணும். (ரிஸ்க் அதிகமாயிருந்து, ரிவார்ட் கொஞ்சம்தான்னா அந்த மாதிரியான டிரேட் எல்லாம் எடுக்காதீங்க!)

சரிங்க! அடுத்த அலசல்!

அடுத்தது நாம் கொஞ்ச நாட்களாகப் பார்த்துவந்த டைவர்ஜென்சுகளில் ஒன்றான பாசிட்டிவ் டைவர்ஜென்ஸ்தாங்க! 2013 ஆரம்பிச்சத்திலிருந்தே விலையானது குறைந்துகொண்டேயிருக்கின்றது. மார்ச் ஆரம்பத்தில் 234 என்ற “லோ” விலை. அதற்கப்புறம் மார்ச் கடைசி வாரத்தில் (தற்போது) அதைவிடக் குறைந்து ஒரு 215 என்ற அளவில் மற்றொரு “லோ” லெவல். ஆனால், MACD histogram மற்றும் RSI, இந்த இரண்டு “லோ” விலைகளுக்கும் சம்மந்தமில்லாமல் மேலே செல்வதைப் பாருங்கள். கரடிகள் வலிமை இழக்கிறார்களோ என எண்ணத்தோன்றும் பாசிட்டிவ் டைவர்ஜென்ஸ் அமைப்பு இது.

படம் 3: எல்‌ஐ‌சி‌எச்‌எஸ்‌ஜி‌எஃப்‌ஐ‌என் -  பாசிட்டிவ் டைவர்ஜென்ஸ்

படம் 3: எல்‌ஐ‌சி‌எச்‌எஸ்‌ஜி‌எஃப்‌ஐ‌என் – பாசிட்டிவ் டைவர்ஜென்ஸ்

அடுத்த அலசல் மிகவும் முக்கியமான ஒரு நியதி

இது டெக்னிக்கல் அனாலிசிஸில் அடிக்கடி நிகழ்வது. இதைப் பற்றி நீங்கள் தெரிந்து கொள்வது மிகவும் அவசியம். “ரீடெஸ்ட்” என்கிற டெக்னிக்கல் அனாலிசிஸின் ஒரு மிகப்பெரிய உண்மைக்கும், இதற்கும் மிகவும் நெருங்கிய உறவிருக்கிறது. “என்னங்க பாபு! மறுபடியும் நீங்க கன்னா, பின்னான்னு எழுத ஆரம்பிக்கிறீங்களே” அப்டீன்றீங்களா? என்னங்க செய்றது? நான் சின்ன வயசிலேயிருந்தே அப்படிதாங்க!

சரிங்க! படத்துக்குள்ளாற போலாமா?

படம் 4: LICHSGFIN - S, R-ஆக மாறுவது!

படம் 4: LICHSGFIN – S, R-ஆக மாறுவது!

புள்ளி 1 மற்றும் 2-ஐச் சேத்து, அப்டீயே ஒரு ரெட் கலர் லைன் வரைஞ்சேனா? “என்னாச்சி?” (ந.கொ.ப.கா படம் பாத்துட்டீங்களா? :)) அந்த லைன் அப்படியே 3 அப்புறம் 4-ன்ற இடங்கள்ள அருமையா ஒரு சப்போர்ட்டா (அட! சப்போட்டா பழம் இல்லீங்க; Support = ஆதரவு நிலை) இருக்குறதப் பாருங்க.

பிப்’13 இரண்டாவது வாரத்துல இந்த சப்போர்ட் உடைபட்டு, விலை கீழேயிறங்கிடிச்சி. அப்புறம் ஒரு வாரத்துக்குள்ள (#5 என்ற இடத்தில்) மறுபடியும், முன்னே சப்போர்ட்டாக இருந்த அந்த லைனைப் போய்த் தொட்டுத் திரும்பற ப்யூடி(beauty)-யைப் பாருங்க. இதைத்தான் ரீடெஸ்ட் அப்டீன்னு சொல்றது. மார்க்கெட் கொடுக்கும் ஒரு சான்ஸ். (மார்க்கெட்டில் பொறுமை அவசியம்னு நான் முதல்ல பல தடவை எழுதியிருக்கேனுங்களே!). அதாவது முன்னாடி சப்போர்ட்டா இருந்த அந்த லைன், இப்போ ரெசிஸ்டன்ஸா மாறுவதுதான் இந்த ரீடெஸ்ட்.

நான் ஏன் beauty அப்டீன்ற வார்த்தையை பயன்படுத்தினேனென்றால், ஒரு மில்லிமீட்டர் கூட பிசகாமல் 3 மற்றும் 4 என்ற இடங்களில் சப்போர்ட் எடுப்பதும், அதேபோல #5 மற்றும் #6 ஆகிய இடங்களில் ரெஸிஸ்டன்சாக மாறுவதும், இந்த டைனமிக் (dynamic) மார்க்கெட்டில் எப்படி சாத்தியமாகிறது?

மார்க்கெட் இன்னுமொரு சான்ஸ்-ஐ, மார்ச் இரண்டாவது வாரத்துல அழகா கொடுக்குது பாருங்க. இன்னொரு தடவை ரீடெஸ்ட் நடக்குது; இன்னொரு தடவை முந்தைய சப்போர்ட், இப்போதைய ரெஸிஸ்டன்ஸா மாறுது. (முன்னாளில் காதலி; இப்போதைய மனைவி!) ஹ…ஹ..ஹா… என்ன ஒரு அருமையான உவமையோட இந்த கட்டுரையை முடிக்க வாய்ப்பளித்தமைக்கு நன்றி கூறி விடை பெற்றுக்கொள்வது ….

அன்பு நண்பன்,

பாபு கோதண்டராமன்

இந்தச் சார்ட்டக் கொஞ்சம் டெக்னிக்கலாப் பாருங்க – பாகம் 2


ஹலோ!

நேற்றைய புதிரான இந்தப் பதிவின் தொடர்ச்சி.

நிஃப்டி ஸ்பாட்.

இதுதாங்க அந்த மிஸ்டரி (mystery) சார்ட்

படம் 1: நிஃப்டி டெய்லி - ஒரு பொதுவான அலசல்

படம் 1: நிஃப்டி டெய்லி – ஒரு பொதுவான அலசல்

இதோட லெவல்களைப் பார்க்கலாம்.

நீல நிறக் கோடான 200 EMA 5,671 என்ற லெவலில் உள்ளது.

நிஃப்டி இன்டெக்ஸ் இந்த 200EMA-வினை மேலிருந்து உடைத்துக் கொண்டு, அதற்குக் கீழே 5,651.35 என்ற லெவலில் முடிவடைந்துள்ளது.

அடுத்த சப்போர்ட்டாக 200SMA (பச்சை நிறக் கோடு) 5616 என்ற லெவல் இருக்கிறது.

இந்த இரண்டு (200EMA & 200SMA) லெவல்களுமே ஒரு முக்கியமான இடமாக கவனிக்கப் படுகிறது. ஏனென்றால், கடந்த 2012 ஜூலையில், இவ்விரண்டு லெவல்களும் கீழ் நோக்கி உடைபட்டாலும், இன்டெக்ஸ் மறுபடியும், உடனே மேல்நோக்கிச் சென்றது.

மறுபடியும், 2012 செப்டம்பரில் கரடிகள் இண்டெக்ஸை கீழே இறக்க முயற்சித்தனர். ஆனால், காளைகள் இந்த மூவிங்க் ஆவரேஜ்களின் அருகினில் நல்லதொரு சப்போர்ட் கொடுத்து, இன்டெக்ஸ்ஸின் அப்ட்ரெண்டை தக்க வைத்தனர்.

அதற்குப் பிறகு இப்போதுதான் மீண்டும் இந்த 200EMA-வை கரடிகள் உடைத்துள்ளனர். எனவேதான், இப்போது ஒரு முக்கியமான ஒரு கேள்வி எழுகிறது. அதாவது, அப்ட்ரெண்டில் இருக்கும்போது “சப்போர்ட்டில் அல்லது சப்போர்ட்டிற்கு அருகில்” வாங்கி மறுபடியும் மேலே செல்லும்போது இலாபத்தில் விற்கவேண்டுமென்பது விதி. அப்படியானால் இப்போது வாங்கலாமா? இது ஒரு அனாலிசிஸ்.

அடுத்த அனாலிசிஸ் கீழே!

நிஃப்டி இன்டெக்ஸ் Dec’11-லிருந்து, ஒரு அப்ட்ரெண்டில் இருந்து வருகிறது. கீழேயிருக்கும் அட்டவணையைப் பாருங்கள்.

 

Dec’11 Low

Jan’13 High

Up move points

%

4531.15

6111.8

1580.65

34.88%

 

இவ்வாறாக 35% உயர்ந்திருக்கும் இன்டெக்ஸ், காளைகளின் கட்டுப்பாட்டில்தான் இப்போதிருக்கிறதா? இல்லை என்றுதான் சொல்ல வேண்டும். அதுமட்டுமல்ல! மேலும் கரடிகளின் ஆதிக்கம் அதிகரிக்கலாமென்றுதான் சொல்ல வேண்டும். ஏனென்றால், கீழேயிருக்கும் வரைபடத்தைப் பார்த்தால், ஒரு ஹெட்&ஷோல்டர் (இனிமேல் H&S-ன்னு சுருக்குகிறேன்) வடிவமைப்பாக இருப்பதைப் பார்க்கலாம்.

படம் 2: நிஃப்டி டெய்லி - கரடிகளின் ஆதிக்கம் இந்த ஹெட் & ஷோல்டர்ஸ் பேட்டர்னில் தெரிகிறதா?l

படம் 2: நிஃப்டி டெய்லி – கரடிகளின் ஆதிக்கம் இந்த ஹெட் & ஷோல்டர்ஸ் பேட்டர்னில் தெரிகிறதா?l

இந்த H&S அமைப்பு, Sep’12-லிருந்து தற்போது வரையில் ஏழு மாதங்களில் உருவாகியிருக்கிறது. தலையின் உச்சப்பகுதியில் 6110 என்ற அளவிலும், அதற்கு நேர் கீழே நெக்லைன் (சிகப்பு நிறத்திலிருக்கும் சாய்கோடு) 5640 என்ற அளவிலும் உள்ளது. எனவே,

டார்கெட் அளவு: 6110 – 5640 = 470 புள்ளிகள் வரை (பிரேக்டௌன் இடத்திலிருந்து) கீழே இறங்க வாய்ப்புள்ளது.

இப்போது டார்கெட் கண்டுபிடிக்கலாம் வாங்க!

இந்த வடிவமைப்பு, நெக்லைனை எங்கே உடைத்திருக்கிறதென்றால், அது கடந்த 20/03/13 அன்று 5720 என்ற அளவிலே உடைத்துக்கொண்டு கீழே சென்றுள்ளது. நாம் டார்கெட் கண்டுபிடிப்பதற்கு இந்த பிரேக்டவுன் லெவலைத்தான் கணக்கிலெடுத்துக் கொள்ள வேண்டும்.

டார்கெட்: 5720 – 470 = 5250 என்ற லெவல் வரையிலும் கீழே செல்ல வாய்ப்புள்ளது.

ஸ்டாப்லாஸ்: வலது ஷோல்டரின் உச்ச அளவான 5950 லெவல்.

என்ட்ரி: “சரிங்க! நான் அந்த நெக்லைன் உடைபடும்போது ஷார்ட் என்ட்ரி போக மிஸ் பண்ணிட்டேன். இப்போது போகலாமா?”ன்னு கேட்டீங்கன்னா, மார்க்கெட் “ரீடெஸ்ட், ரீடெஸ்ட்”ன்னு மறுபடியும் ஒரு சான்ஸ் கொடுக்கும். (ஆனால் இந்த ரீடெஸ்ட் நிச்சயமில்லை). அதாவது இது வரையிலும் சப்போர்ட்டாக இருந்த நெக்லைன் இந்த ரீடெஸ்ட்டின் போது, ரெஸிஸ்டன்சாக மாற வாய்ப்புள்ளது. அப்போதும் ஷார்ட் என்ட்ரி செய்யலாம்.

ரீடெஸ்ட் என்றால் என்ன?

ரொம்ப சிம்பிள்தாங்க! உடைபட்ட லெவலை மறுபடியும் தொட முயற்சிப்பதுதான் ரீடெஸ்ட். அதாவது இங்கே, இதுவரை சப்போர்ட்டாக இருந்த லெவலை உடைத்துக்கொண்டு கீழே சென்றால், கொஞ்சம் மேலே திரும்ப வாய்ப்புள்ளது. அவ்வாறு மேலே திரும்பினால், முந்தைய சப்போர்ட்டானது ரெஸிஸ்டன்சாக மாறுமென்பது டெக்னிக்கல் அனாலிசிஸின் ஒரு கூற்று. இதைப் போலவே முந்தைய ரெஸிஸ்டன்சும் சப்போர்ட்டாக மாறுமென்பது இன்னொரு கூற்று.

சரி! இது ஒரு வலிமையான நெக்லைன் பிரேக்டௌனா?

இந்த ரைட் ஷோல்டரில் (RS என்று குறிப்பிடப்பட்டுள்ள இடம்), விலை மேலே ஏறும்போது வால்யூம் குறைந்து கொண்டே வந்ததையும், கரடிகளின் கை ஓங்கி, விலை குறைந்துகொண்டே வந்து, பிரேக்டௌன் ஆனபோது, வால்யூம் அதிகரித்துள்ளதையும் பார்க்கும்போது, இது ஒரு வலிமையான கரடிகளின் ஆதிக்கத்தைத்தான் நன்கு காட்டுகிறது.

ரைட் ஷோல்டரின் போது மட்டுமல்லாமல், தலைப்பகுதியிலும் (Head என்று குறிப்பிடப்பட்டுள்ள இடம்) விலை உச்சத்தைத் தொடும்போது, வால்யூம் குறைந்துகொண்டே வந்திருக்கிறது. இதுவும் காளைகள் வலிமையிழக்கிறார்கள் என்றே காட்டுகிறது.

“என்னங்க நீங்க! காளைகள் பக்கமும் சாதகமா எழுதிட்டு, 5250 வரையிலும் கீழே செல்லவும் வாய்ப்பிருக்குதுன்னு குழப்புறீங்களே”ன்னு கேக்குறீங்களா? அதுதாங்க லைஃப்!

அதெல்லாம் இருக்கட்டுங்க! இதுலேயே ஒரு நெகட்டிவ் டைவர்ஜென்சும் இருக்குது. அதனாலதான் MACD, RSI மற்றும் STOC-க்களையும் கொடுத்திருக்கேன். அதைப் பத்தி நாளைக்கு எழுதறேன்.

 

அதுவரை அன்புடன்,

பாபு கோதண்டராமன்

 

20130321 BankNifty FUT ஹெட் & ஷோல்டர்


ஹலோ!

இதனை mother of all patterns என்று கூட சொல்லலாம். படத்தைப் பாருங்கள்! எல்லா விளக்கங்களும் அதிலுள்ளன.

படம்: பாங்க் நிஃப்டி FUT டெய்லி வரைபடம்: கரடிகளின் ஆதிக்கமா? காளைகள் ஓய்ந்து விட்டனரா?

படம்: பாங்க் நிஃப்டி FUT டெய்லி வரைபடம்: கரடிகளின் ஆதிக்கமா? காளைகள் ஓய்ந்து விட்டனரா?

பதிலுக்குக் காத்திருக்கேனுங்க!

அன்புடன்,

பாபு கோதண்டராமன்

பி.கு: நான் எழுதிக்கொண்டிருக்கும்போதே 11,525-லிருந்து 11360 வரை கீழே சென்று விட்டதே!

1020-லிருந்து 17.70 வரை – விஷால் ரீடெயில்


ஹலோ ஃபிரண்ட்ஸ்!

கொஞ்சம் V வரிசை ஸ்டாக்குகளையெல்லாம் ஒரு ரவுண்ட் பார்த்தேன். அதிலே எனது கவனத்தை ஈர்த்தது இவ்விரண்டு ஸ்டாக்குகளும்தான். ஏனெனில், முன்னொரு காலத்திலே, அதாவது சந்தை zooooooom என்று மேல் நோக்கிச் சென்று கொண்டிருத்த காலத்தில் (2007/2008-களில்) வந்த செய்திகளின் தாக்கத்தை வைத்து இவ்விரண்டினை வாங்கிய சிறு முதலீட்டாளர்கள் பல லட்சக் கணக்கிலிருப்பார்கள். இன்று வரை விற்காமல், மேலும் மேலும் விலை குறைந்து வந்து போதெல்லாம் ஆவரேஜ் செய்து வந்தவர்களும் ஏராளம். அதன் நிலைமை என்னவாயிற்று? பார்க்கலாம்.

VISHALRET

ராம் சந்திரா அகர்வால் அவர்களின் VISHAL RETAIL-இன் IPO ரூ. 240-க்கு 81 மடங்கு subscribe செய்யப்பட்டது.  எத்தனை ஆயிரம் பேர் முண்டியடித்துக்கொண்டு முதலீடு செய்தோம்? 2007 ஜூலை 4-ஆந்தேதி (அமெரிக்க independance day) IPO-வில் ரூ.472.50/-இல் ஆரம்பித்த இன்னிங்ஸ் அன்று மாலை மிகவும் வெற்றிகரமாக ரூ.784.40-இல் முடிந்தது. (85 ball century on debut மாதிரி ஒரே கலக்கல்தான் போங்க! – அந்த ஷிகார் தவான் தம்பிய இங்க ஒப்பிடறதுக்கு மனசு வரலதான். இருந்தாலும், opening சூப்பர்-ஆ இருக்குதே! அந்தத் தம்பி நல்லா வளர, வாழ வாழ்த்துக்கள்!)

ஆறே மாதங்களில், அதாவது 2008 ஜனவரி 7-ஆந்தேதி உச்ச விலையாக ரூ.1,020/-ஐத் தொட்டது. அதன் பிறகு ஆசை யாரை விட்டது? நம்மில் யாரேனும், அதன் பிறகு, ஒரு trailing stoploss வைத்து பிராஃபிட் பார்த்தோமா? இல்லையே!

20120315 VISHALRETlinefrom970 to 17n70படம்: விஷால் ரீடெயில் – ஃப்ரம் IPO to குப்பைத்தொட்டி

அதெல்லாம் போகட்டும் 2008 ஜூன் மற்றும் ஜூலையில் ஒரு ஹெட் & ஷோல்டர் பேட்டர்ன் வடிவெடுத்து, 740-760 லெவல்கள் உடைபட்ட போதாவது (படத்திலிருக்கும் சிகப்புக் கலர் நெக்லைன்) இந்த ஸ்டாக்கை விற்றிருக்க வேண்டும். விற்கவில்லையே!

ஜூனில் உடைபட்ட பிறகு, நாம் வெளியே வர, மார்க்கெட் நமக்கு  மறுபடியும் ஒரு சான்ஸ் ஜூலையில் கொடுத்தது. அதாவது ஜூனில் உடைபட்ட நெக்லைன் சப்போர்ட், ஜூலையில் “ரீடெஸ்ட்” செய்யப்பட்டு அது ரெஸிஸ்டன்ஸ்-ஆக மாறியது. அப்போதாவது வெளியில் வந்தோமா?

இல்லையே! மேலும் மேலும் கீழேயிறங்க, நாம் மேலும் மேலும் நம்பிக்கையுடன்தானே ஆவரேஜ் செய்தோம்? நமது நம்பிக்கையெல்லாம் தூள் தூளானது; எது நடந்துவிடக்கூடாதென்று பயந்தோமோ, அந்த பயமே கடைசியில் நிஜமானது.

ஆயிரம் ரூபாய் ஹை எங்கே? ரூ.17.70 பைசா எங்கே? (தற்போது இது V2RETAIL என்ற பெயரில் மறு நாமகரணம் சூட்டப்பட்டு ரூ.10/- என்ற அளவிலே இன்றைய தேதியில் வர்த்தகமாகிறது.

ஆண்டவா!

எங்கே ட்ரெண்ட்லைன் சப்போர்ட் உடைபட்டு, ட்ரெண்ட் மாறுகிறதோ, அங்கேயே பொசிஷனை கட் செய்யும் மன வலிமையைக் கொடு.

எங்கே பேட்டர்னின் சப்போர்ட் உடைபடுகிறதோ, அங்கேயாவது வெளியில் வர துணிவைக் கொடு.

“சார்ட்-ஐ மட்டும் பாருடா பாபு; நியூஸ்-ஐப் பார்க்காதே!” அப்படீன்னு நல்ல புத்தியக் கொடு.

“தமிழ்ல எனக்குப் பிடிக்காத ஒரே வார்த்தை – ஆவரேஜ்-தான்” அப்படிங்கற பன்ச் டயலாக்-ஐ என் புத்தியில எப்படியாவது ஏத்திடு சாமி!

பக்தன்,

பாபு கோதண்டராமன்

பி.கு: ஹையா! இன்னொரு ஸ்டாக் என்னன்னு இப்பவே சொல்ல மாட்டேனே! நீங்க கொஞ்சம் வெயிட் பண்ணுங்க! 🙂

என்னங்க? ஓ.. க்ளூ வேணுமா? அதான் V வரிசைன்னு சொல்லிட்டேனே!